Blog

விஜயதசமியையொட்டி கோயில்களில் ஏடு தொடங்கும் நிகழ்ச்சி நடந்தது. குழந்தைகளுக்கு அ, ஆ.. எழுத கற்று கொடுத்தனர். இந்துக்களின் முக்கிய பண்டிகையான நவராத்திரி விழா கடந்த 2ம் தேதி தொடங்கியது. 9 நாட்கள் நடைபெறும் இந்த விழாவில் சக்தியை 3 நாள் துர்க்கையாகவும், 3 நாள் லெட்சுமியாகவும், 3 நாள் சரஸ்வதியாகவும் வழிபடுவார்கள். 9வது நாள் சரஸ்வதி பூஜை, ஆயுத பூஜை விழா கொண்டாடப்படும். அதன்படி நேற்று சரஸ்வதி பூஜை மற்றும் ஆயுதபூஜை விழா கொண்டாடப்பட்டது. விழாவின் 10வது நாளில் விஜயதசமி விழா கொண்டாடப்பட்டது. இதையொட்டி கோயில்களில் ஏடு தொடங்கும் நிகழ்ச்சி நடந்தது. பெரியவர்கள் மடியில் அமர செய்து, அரிசியில் குழந்தைகளுக்கு எழுத்து எழுத கற்று கொடுத்தனர். முதலில் அ, ஆ.. எழுத செய்தனர். ஏடு தொடங்கும் நிகழ்ச்சியில் ஏராளமான பக்தர்கள் கலந்து கொண்டனர். விஜயதசமியில் ஆரம்பிக்கும் அனைத்து காரியங்களும் வெற்றியுடன் கைகூடும் என்பது நம்பிக்கை ஆகும். இதே போல் நர்சரி மற்றும் தொடக்க பள்ளிகளில் நேற்று குழந்தைகள் புதிதாக சேர்க்கப்பட்டனர். இந்த விஜயதசமி திருநாளின் போது ஏராளமான குழந்தைகளைப் பள்ளியில் சேர்ப்பதும் பெற்றோரின் வழக்கம்.சரஸ்வதி பூஜையன்று பள்ளியில் சேர்ந்தால் தன் குழந்தை நன்றாகப் படிக்கும் என்பது ஒவ்வொரு பெற்றோரின்நம்பிக்கையும் கூட.

 

நவராத்திரி திருநாளில் பத்து நாட்களும் , விதவிதமான கொலு பொம்மைகளை வைத்து தெய்வத்தின் நாமாவளிகளை பாடி மகிழ்ந்தோம். உற்றார் உறவினர்கள் ,நண்பர்கள் என பலரையும் அழைத்து உறவுகளையும் மேம்படுத்தும் திருநாளாக அமைந்தது நவராத்திரி பெரு விழா.  இந்துகளின் பண்டிகைகளில் பத்து  நாட்கள் கொண்டாடப்படும் விழாவான  நவராத்திரி கால கட்டத்தில்  நமது  வீட்டில் அனைத்து தெய்வங்களும் குடிபுகுந்து நம்மை காக்கிறது.நம் வீட்டில் வைத்திருந்த கொலு பொம்மைகளை நல்லபடி பராமரித்தால் நமக்கு எல்லா  அனுக்ரஹங்களும் சர்வ நிச்சயமாக வந்து சேரும்.

 நவராத்திரி திருநாளில் போற்றி வைத்திருக்கும் கொலு பொம்மைகளை எப்படி பராமரிப்பது? என்ற கேள்வி எல்லார் மனதிலும் எழுகிறது. இந்த கேள்விக்கான விடைதான் இந்த பதிவு.

கொலு பொம்மைகளை பராமரிக்க எளிய வழிகள்

முதலில் கொலு பொம்மைகளை கொலு படியில் அடுக்குவதற்கு முன் கொலு  படிகளை நன்றாக சரிபார்க்க வேண்டும். கொலு பொம்மைகளை மேல் படியில் இருந்து அடுக்கிகொண்டு வரவும்.  கொலு படிகளை அலங்கரிக்க காட்டன் துணிகளை மட்டும் பயன்படுத்த வேண்டும். கொலு பொம்மைகளை அழுத்தி துடைக்ககூடாது.தினமும் பூஜை செய்த பிறகு கொலு படிக்கு கீழ் படைத்த  தின்பண்டகளை எடுத்து விட வேண்டும். எலி போன்ற ஜீவ ராசிகள் கொலு படியை தள்ளி விடக்கூடும் என்பதாலேயே இந்த எச்சரிக்கை.

இப்படி கொலுவை பாதுகாத்த நாம் கொலு முடிந்தவுடன் இந்த வருடம் என்ன என்ன பொம்மைகளை எந்த படிகளில் வைத்தோம் என எழுதிவைத்து கொள்வது அடுத்த வருடத்துக்கு கொலு வைக்கும் போது எளிதாக இருக்கும்.கொலுவில் இருக்கும் பொம்மைகளின் பெயர்களை எழுதிவைத்து கொள்வதும் குழப்பங்களை தவிர்க்க உதவும். அடுத்த வருடம் கொலு வைக்கும்போது நம்மிடம்  இல்லாத பொம்மைகளை வாங்க இந்த குறிப்பு பயன்படும்.

.

கொலு படிகளை கலைத்து பொம்மைகளை திரும்ப பெட்டிகளில் அடுக்கி வைக்கும்போது எந்த எந்த பெட்டிகளில் என்ன என்ன பொம்மைகள் உள்ளன என்று எழுதிவைத்துகொள்ளவும் .பெட்டிகளில் பொம்மைகளை அடுக்கும்போது காகித பொம்மைகளாக இருந்தால் நிற்கவைக்கவும், காகித பொம்மைகளை படுக்கவைக்ககூடாது.

எவ்வளவு ஆர்வத்துடன் கொலு வைக்கின்றோமோ அந்த ஆர்வத்துடனே  பொம்மைகளை நன்றாக அடுக்கி முறையாக பராமரிக்கவேண்டும்,

இந்த பராமரிப்பு அடுத்தாண்டு கொலுவை மேலும் சிறப்பிக்கும்.

 

நம்முடைய இந்து மதத்தில்,  கல்விக்குரிய தெய்வமாக சரஸ்வதியைப் போற்றுகிறோம். கலைமகள், சியாமளா என்றெல்லாம் அழைக்கப்படும் கலைவாணி முப்பெருந்தேவியரில் ஒருவராக போற்றப்படுகிறார். ஆயகலைகள் 64ல் கல்வி மட்டுமல்லாமல் அனைத்து கலைகளுக்கும் அதிபதி கலைமகள்.

வெண்ணிறத் தாமரைப் பூவில் உறைபவளான  கலைமகளுக்குரிய வாகனம் வெண்ணிறப் பறவையான அன்னம். அவள் உடுத்தும் ஆடையும் பளிங்கு நிற தூய  வெள்ளைப் புடவை. அழகுத் திருக்கரங்களில் ஏந்தியிருக்கும் முத்துக்களால் ஆன ஜபமாலையும் வெள்ளை. சரஸ்வதியை மனக்கண்ணில் நிறுத்தி காணும் போது தூய்மைக்கு இலக்கணமாகத் திகழும் வெள்ளை நிறம் தான் நம் உள்ளத்தை நிறைக்கும். இதன் தாத்பரியம் எந்த ஒரு கலையில் நாம் சிறந்து விளங்க வேண்டுமானாலும், நம் உள்ளம் தூய்மையாக  இருக்கவேண்டும் என்பதே. உள்ள அர்ப்பணிப்போடு, கலையை கற்பிப்பவர்கள், கல்வி, கேள்விகளில் சிறந்து விளங்க முடியும் என்பதற்காக தான் ,வெண்மை நிறத்தை சரஸ்வதிக்குரியதாக வைத்தனர். வெண்தாமரையில் வீற்றிருக்கும் கலைமகளும் வெள்ளை மனம் கொண்டவர்களுக்கு தான் வேண்டிய ஞானத்தை வாரி வழங்குகிறாள்.

சரஸ்வதிதேவி என்றதும்,வெண்மை நிறத்திற்கு அடுத்து அவள்  கையில் இருக்கும் வீணை தான் நம் நினைவிற்கு வரும்.  கல்விக்கு எல்லை என்பதே கிடையாது. மேலும் கல்வியின் சிறப்பே, எடுக்க எடுக்க ஊறும் ஊற்றைப் போல அடுத்தவர்க்கு சொல்லி கொடுக்க கொடுக்க கற்பிப்பவர்களுக்கும் ஞானம் வளரும்.  எந்த ஒரு கலையையும் கற்றுக்கொள்ள விஜயதசமி நன்னாளே சிறந்தது. சரஸ்வதி தேவியை வழிபடுபவர்கள் சரஸ்வதி தேவியின் மூலமந்திரம், அஷ்டோத்ர நாமம் , சஹஸ்ரநாம ஸ்தோத்ரம் ,நாமாவளி ,ஸ்லோகங்கள் ஜெபித்து வழிபட கலைகள் வசப்படும்.

ஸ்ரீ சரஸ்வதி தேவி பல நாமங்களால் போற்றப்படுகிறாள். பாரதி , சரஸ்வதி, சாரதா தேவி, ஹம்சவாகினி, ஜகதீக்யாதா,மகேஸ்வரி,கௌமாரி, பிரம்மச்சாரிணி, வித்யதாத்ரிணி,வரதாயினி,ருத்ரகண்டா,புவனேஸ்வரி.

வேத ஸ்வரூபியான பகவான் ஸ்ரீ ஹயக்ரீவருடைய சிஷ்யையே ஸ்ரீ சரஸ்வதி தேவி.எனவே ஸ்ரீ ஹயக்ரீவரை வழிபடுபவர்களுக்குச்  சரஸ்வதி தேவியின் அருள் தானாகவே கிட்டும் என்று சாஸ்திரங்கள் கூறுகின்றன.

 

                                                                         

 

குழந்தைகள் கல்வியில் சிறந்து விளங்கவும், எந்தக் கடினமான விஷயத்தையும் எளிதில் விளங்கிக்கொள்ளவும் ,விளக்கிச்சொல்லவும் வல்லவர்களாக விளங்கச் செய்யும்  ஸ்ரீ சரஸ்வதி ,ஸ்ரீ ஹயக்ரீவர் மந்திரங்களை  நாள்தோறும் சொல்லலாம்.

 

சரஸ்வதி நமஸ்துப்யம் வரதே காமரூபிணி

வித்யாரம்பம் கரிஷ்யாமி சித்திர்பவது மே சதா

 

தேவி சரஸ்வதி! உனக்கு நமஸ்காரங்கள்.வரம் தருபவளே!வேண்டியவற்றைத் தருபவளே! கல்வித் தொடக்கத்தை செய்கிறேன். அனைத்தும் அடியேனுக்குச் சித்தி ஆகட்டும்!

இதனை தினமும் ஜெபித்து வர நல்ல நினைவாற்றல் ,கஷ்டமான விஷயங்களையும் விளங்கிக்கொள்ளும் ,விளக்கிச்சொல்லும் திறன் உண்டாகும்.

 

சரஸ்வதி காயத்திரி மந்திரம் :

 

‘ஓம் பிரம்ம சக்தியை வித்மஹே

பீதவர்ணாயை தீமஹி தன்னோ

பிராம்ஹீ ப்ரசோதயாத்’

பொருள்: பிரம்ம சக்தியை அறிவோம்.  சரஸ்வதி தேவியை தியானம் செய்வோம். அவள் நமக்கு ஊக்கம் தந்து அருள்புரிவாளாக.

சரஸ்வதி காயத்திரி மந்திரத்தையும் 108 முறை சொல்லி வந்தால் சிறப்பான  பலன்களை அன்னை நமக்கு தந்தருள்வாள்.

மாணவர்கள் கல்வியில் சிறந்து விளங்க சரஸ்வதி மந்திரம் இதோ ……
ஓம்ஹிரீம் ஐம்ஹிரீம் சரஸ்வத்யை நமஹ.